“أبلة فاهيتا” تكشف سبب دخولها مجال تأليف الكتب: مش عاجبني حال الناس
كشفت الدمية الشهيرة “أبلة فاهيتا” عن سبب دخولها مجال تأليف الكتب مؤخرا، وطرحها أول كتاب من تأليفها ويحمل عنوان “أنا”.
وقالت “أبلة فاهيتا” خلال لقائها مع الإعلامية سارة دندراوي في برنامج “تفاعلكم” المذاع عبر قناة العربية: “لقيت نفسي حالي مش عاجبني ولا عاجبني حال الناس، كله ماشي زي القطيع في رحلة تعيسة للبحث عن السعادة ومش سعدا”.
وأضافت: “الكتاب ده رحلة ذاتية للبحث عن النفس، تقريه وتجاوبيه وتلاقي نفسك ويمكن تعرفيها”.
أكدت أبلة فاهيتا أن الكتاب ليس محاولة منها لمزاحمة مشاهير السوشيال ميديا ممن دخلوا عالم التأليف قائلة: “أنا مش بزاحم، أنا دايما أدخل على مجال موجود وأسيب بصمتي، وقدمت قبل كده برامج والبرامج موجودة من أيام فرعون”.
وتابعت: “البني آدم عامل زي الدولاب المكركب، كل فترة لازم تخشي جواه وتوضبيه، وعنوان الكتاب مش نرجسية، القارئ هو المقصود بكلمة أنا، ده كتابك إنت وكتاب خاص بالقارئ، وأنا عاملة إهداء لروحي”.
وردا على سؤال من الأشخاص الذين ترغب في إهداء الكتاب لهم، قالت أبلة فاهيتا: “كل الناس محتاجة الكتاب، مش لازم تبقي متعددة زي غادة عبد الرازق علشان تحتاجي الكتاب”.
وعقبت أبلة فاهيتا على إشادة النجم عمرو يوسف بها مؤخرا في تصريحات تليفزيونية قائلة: “عمرو دايما لما يشيلني على كتافه بطوله الشاهق ده بياخدني في حتة تانية، لولا كندة بتيجي تنزلني”.
كما كشفت أبلة فاهيتا أنها تفكر في اقتحام عالم الفضاء في الفترة المقبلة بقولها: “هبقى رائدة فضاء، حاجزة أول رحلة مع إيلون ماسك وهطلع المريخ، يمكن نلاقي هناك كائنات ألطف من البشر”.
