شيرين عبد الوهاب: كلام حسام حبيب مضبوط وأخويا محمد باعني وهناك شخص عايز يقعدني في البيت

تحدثت النجمة شيرين عبد الوهاب في تسجيل صوتي أرسلته للإعلامي عمرو أديب لعرضه في برنامج “الحكاية” للحديث عن أزمة التسريبات الصوتية لطليقها الفنان حسام حبيب التي يتحدث فيها عن شقيقها محمد عبد الوهاب.

قالت شيرين عبد الوهاب: “فوجئت باللي حصل على السوشيال ميديا بين محمد عبد الوهاب وحسام حبيب، وحبيت أكد أن كلام حسام مضبوط جدا، وأخويا فعلا باعني، والتصريح اللي نزل دا نزل من محامي محمد شاعر المستولي على السوشيال ميديا بتاعتي، وبالتوكيل أنا كنت عاملة له قديم، مضى له ورقة أو عقد تملكه من حساباتي، وموقعين بتاريخ قديم، كل كلام حسام حبيب مضبوط، وماتصدقوش أي حاجة من كلام محمد عبد الوهاب”.

وأضافت: أنا مابحبش اتكلم عن مشاكلي الشخصية دلوقتي، عشان ماشغلش حد، والناس ماتقعدش تقول احنا ماورناش غير شيرين ومشاكل شيرين، لكن لازم تفهموا أن في أغاني حلوة جدا جدا، توما عاملها وعزيز الشافعي ومدين، وفي حاجات بتخلص من التصريحات عشان المشاكل مع الشركة المنتجة، في حد بشخصه قاصد يقعدني في البيت، بنخلص الحاجات دي والأغاني هتنزل وهتعجبكوا جدا، وبإذن الله الأغاني هتعجبكم.

وعن ظهور حسام حبيب من جديد للحديث عن حياتها رغم طلاقهما وإعلانها خطوبتها من شخص آخر، قالت: “مشكور أن هو بيرد بالنيابة عن أهلي، وهو اللي بيقول الحقيقة مش أهلي، وبرغم أن القضاء المصري حكم بانتهاء عقدي مع روتانا، هم لسه رافعين قضايا علي، وموقفين الدنيا كلها، لكني واثقة في نزاهة وقضاء بلدي.

واختتمت قائلة: أنا اسفة اني بشيلكم أخباري، بس أنا اضطريت، صحيت لقيت مواقع التواصل الاجتماعي مقلوبة، وماليش دخل في اللي بيحصل دا، صدقوني أنا مش عايزة اضايقكم بأي أخبار عني حلوة أو وحشة، أكيد كل واحد عنده هموم ومشاكل، ودا اللي بيتقال معندناش غير شيرين، صدقوني مش قصدي، بدليل إني مكنتش بتكلم الفترة اللي فاتت، أنتم أهلي وسندي وأثبتوا لي كدة وبتردوا غيبتي، وأي بيان لي هيصدر من مكتب المحامي ياسر قنطوش، وانتم عارفين مين اللي بيقولوا الحقيقة، هو مش أهلي.

وكان حسام حبيب يتحدث في المحادثات الصوتية المسربة عن أسرة طليقته شيرين عبد الوهاب، مشيرا إلى أنهم آذوها وهم سبب خلافها مع شركة روتانا.

يذكر أن حسام وشيرين ارتبطا في أبريل 2018، وشهدت الحياة بينهما العديد من الخلافات، وانفصلا ثم عادا مرة ثانية في نوفمبر 2022، ثم انفصلا آخر مرة في ديسمبر 2023، ليتم إعلان ارتباط شيرين مؤخرا برجل آخر.