تامر سمير: عمرو سعد وأحمد عز مبيردوش عليا.. واترفضت في عبود على الحدود بسبب محمد هنيدي
كشف الفنان تامر سمير، عن لجوئه لـ الفنان عمرو سعد وأحمد عز، لمساعدته في العمل معهم ولكن تم تجاهله، مؤكدًا أنه لا يمتلك واسطة.
وقال تامر سمير، في لقائه مع الإعلامية إنجي هشام، في برنامج “المنسي” المذاع عبر شاشة قناة “هي”: أنا ماليش وسايط في الفن، والموضوع اتغير وبقى شلل وأصحاب، وأنا بسعى وببدء بزملائي النجوم في منهم اللي بيرد وغيره يشوف الرسالة وميردش، وفي ناس لو شافني هيفتكر أيام الكحرتة، ومش هينفع أقول زي مين ولكن منهم نجوم صف أول.
وتابع: في مليون دور في المسلسلات شبهي، وفي ناس بتبقى نفسيتها مش لطيفة ومبترشحنيش، كنا بنقسم اللقمة والربع جنيه، مش عايز يجبني علشان ميفتكرش أيام المترو، واللي بقوله ده حقيقي، إزاي نبقى زملاء وأصدقاء ولو أنا مزنوق ماديًا وقت ظروف مرض أمي وببقى عايز فلوس، وأكلم حد يقولي تمام أنت معايا، ومفيش بعد كده، مفيش زميلي وصاحبي هيجبني معاه في دور علشان مفكرهوش بأيام الكحرتة.
وأضاف: اتصلت بـ عمرو سعد وأحمد عز، علشان يجبوني معاهم في أدوار وشافوا الرسايل ومردوش عليا، ومزعلتش وأعرف صاحبك وعلم عليه.
كذلك تحدث الفنان تامر سمير، عن فترة غيابه عن الساحة الفنية، بجانب العمل مع الراحل سمير صبري في برنامجه هذا المساء، مؤكدًا أن هذا البرنامج كان بوابته الحقيقة لعالم التمثيل.
وقال تامر سمير: زمان كنت أخرج من فيلم أدخل فيلم تاني، وأي منتج زمان كان اللي يهمه الخام، ويوسف شاهين كان أهم حاجة عنده البروفات، ومحدش كان يعرفني لما كنت شغال مع يوسف شاهين محدش عرفني لأني كنت مربي ذقني، ولكن لما عملت برنامج مع سمير صبري كله كان عايز يمضي معايا عقود احتكار، بس الوحيد اللي مضيت معاه وهو بالنسبة لي أب روحي، هو محمد حسن رمزي رحمة الله عليه، وكان مكتوب في العقد شرط جزائي مليون جنيه لو سيبته.
وتابع: سمير صبري في الأول قدمني وحش في برنامج هذا المساء، وأول ما شافني قالي أقعد قدام، والحلقة كانت عن الإكتئاب، وندهلي على الاستيدج وقرأت كل القرآن اللي أنا حافظه لغاية ما وصلت وقعدت أهزر معاه، وبقينا أصحاب، وبعد كده طلعت معاه في حلقة تانية، وقدمني حلو جدًا وقالي الحلقة فرقت معاك، قولتله أه فرقت وجبت غسالة لـ أمي.
وعن سبب غيابه عن الساحة الفنية: ممكن يبقى العيب فيا لأني مش اجتماعي أوي، أنا اشتغلت مع عظماء، ويمكن الجيل الجديد يكون عارفنا وإحنا برضوا شكلنا اتغير، واخترعوا حاجة اسمها كاستينج بس مينفعش في السن ده، أه تاريخي مش كبير ولكن مينفعش يتقالي تعالى أعمل أوديشن.
وأضاف: لو هعمل أدويشن يتبعتلي الورق واتساب وأذاكر وأروح أعمل في يوم لوحدي مش مع حد، والأدويشن اللي أنا عملته كان مع الأستاذ شريف عرفة في فيلم عبود على الحدود وكنت همضي ولكن إيمان حداد المخرجة زميلتي، قالتلي شريف عرفة معجب بيك جدًا ولكن حد اعترض عليا لأني شبه محمد هنيدي أوي.
وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.
