بسمة: عيب “نعناعة” في “مسار إجباري” إنها “عيوطة” ومش بخاف من دور الأم
قالت الفنانة بسمة في تصريحات صحفية عن شخصية “نعنانة” في “مسار إجباري” : “مكنتش عارفة حاجة عن المسلسل في البداية لكن كنت عايزة اشتغل مع نادين خان لأنها مخرجة شاطرة، وبدأت أعرف عن شخصية “نعناعة” إنها ست بسيطة وطيبة وفرفوشة روحها في ابنها وبتحب الحياة، وحدانية ومقطوعة من شجرة بعد موت أمها وأبوها في حادثة، هي ست لطيفة عيبها الأساسي إنها “عيوطة”، دي التركيبة اللي اشتغلت عليها قبل ما تتكتب الحلقات، من التفاصيل دي اشتغلت على الشخصية طريقتها في الكلام وشكلها الخارجي، كان في جزء من التحضير النفسي الشخصية دي لما تتعرض لموقف ما رد فعلها إيه، والمشترك بيني وبينها إحنا أمهات وعندنا قدر من التسامح”.
وأكدت بسمة أنها لا تقلق من فكرة تقديم دور أم لشاب قائلة: “المخرجة نادين خان من كام سنة كانت عايزين أعمل أم أحمد داش في مسلسل “أهل إسكندرية” لكن متعملش، أنا بحب أحمد داش وأعرفه من زمان وكنا زملاء مع بعض في أكتر من ورشة تمثيل وبحبه جدا، هو ممثل شاطر جدا ومجتهد والمشاهد اللي بينا كنا شغالين عليها على الأحاسيس قبل الكلام، وأنا بشوف أن دا تمثيل ومش هيلزق فيا في حياتي النهاردة أنا أم أحمد داش، من سنين كنت أم محمد الشرنوبي وقبلها بكام سنة كنت أم راندا البحيري اللي هي أصلا قدي، إحنا بنمثل واللي بيتفرج عليا عارف إننا بنضحك عليه ولو بنقدمه بحرفة هيوافق”.
