هالة صدقي تحكي كواليس تغيير نهاية “أرابيسك” لـ صلاح السعدني

استعادت الفنانة هالة صدقي ذكرياتها مع الفنان الراحل صلاح السعدني، والنجاح الكبير الذي حققاه في مسلسل “أرابيسك” لدرجة دفعت صناع العمل لتغيير النهاية في النسخة التي عرضت في مصر عقب عرضه في الوطن العربي.

وحكت هالة صدقي خلال مداخلة هاتفية مع برنامج “أسرار النجوم” من تقديم إنجي علي عبر إذاعة وقناة “نجوم FM”: “صلاح السعدني أكتر فنان أنا اشتغلت معاه في حياتي عاملين مع بعض تقريبا 14 مسلسل دا غير الإذاعة، كنا بنرتاح جدا في الشغل مع بعض كنت بفهمه من نظرة عينيه عايز إيه، من كتر ما الناس جبتنا مع بعض النهاية بتاعة أرابيسك اتغيرت، لأن العرض في الوطن العربي كان سابق العرض في مصر، اتذاع في النسخة اللي اتعرضت في الوطن العربي إن “توحيدة” متجوزتوش، لكن في مصر عملنا مشهد إضافي إن “توحيدة” اتجوزت “حسن” من كتر ما كانوا الناس بتحبه”.

وتابعت هالة صدقي متحدثه عن صلاح السعدني: “أنا في ذكريات كتيرة مع صلاح السعدني، أول حاجة عملتها معاه كان “الأب العازب” ودا كان تاني مسلسل ليا في حياتي، عملت معاه “أرابيسك” و”عمو عزيز” و”دمار شامل”، دا الممثل الوحيد اللي اشتغلت معاه بهذا الكم من كتر ما الناس حبتنا مع بعض، وأنا اتعلمت منه كتير، اتعلمت صفاء النية ونضافة القلب، كان دايما يشجعني على الشغل وإني أسيبها على ربنا وهو يكتبلي الخير”.

وأكملت هالة صدقي: “صلاح السعدني هو النموذج للفنان المثقف، إنسان بسيط وعنده كاريزما جميلة وبيحب الخير للكل، أنقى قلب أنا اتعاملت معاه في الوسط الفني”.