مدحت شلبي يحكي عن حفل أحياه عمرو دياب في بداياته: جه في ميكروباص وأجره 500 جنيه وقالوا لى “هزه”
استعاد المعلق الرياضي مدحت شلبي ذكرياته مع الفنان عمرو دياب وحفل أحياه في بداياته في كلية الألسن.
وخلال حلقة الأمس في برنامج “مساء الأنوار” والتي حل فيها ضيوفا الكابتن حسام البدري وجمال عبد الحميد، رفضوا التعليق على أزمة صفع عمرو دياب لشاب، وحكى مدحت شلبي حكاية طريفة جمعته بعمرو دياب.
وقال مدحت شلبي: “بحكي حاجة هقولها لأول مرة أنا كنت قائد حرس كلية الألسن جامعة عين شمس، كنا عاملين حفلة في الكلية بنسلي الناس، فجايبين نجمين النجم الأول بتاع الحفلة الله يرحمه سمير الإسكندراني واللي بيسند معاه عمرو دياب”.
وتابع مدحت شلبي: “سمير الإسكندراني في الوقت ده كان أجره 1800 جنيه وكان مبلغ في الوقت ده، أما عمرو دياب كان مقرر ليه هو وفرقته 500 جنيه، وهو كان جاي في ميكروباص”.
وأكمل مدحت شلبي: “عمرو دياب كان عندي في المكتب ولقيت عميد الكلية الدكتور شعيب بيكلمني وبيسألني “المطرب عمرو عندك؟” قلت له أيوة، قالي “هزه شوية” كان عايز يخفض الـ500 جنيه، قلت له أهزه فين دا جاي في ميكروباص ودافع 100 جنيه ليه من بورسعيد أهز إيه”.
وتصدر الفنان عمرو دياب التريند خلال اليومين الماضيين بسبب انتشار فيديو ظهر فيه يصفع معجب حاول التقاط صورة معه، خلال إحيائه حفل زفاف ابنة المنتج محمد السعدي.
انتشر الفيديو بشكل كبير عبر مواقع التواصل الاجتماعي مع انتقادات لعمرو دياب وانفعاله وتصرفه مع المعجب، وبدأت مطالبات له بالاعتذار عما حدث.
