محمد هنيدي: كنت هعمل فيلم إشاعة حب الجزء الثاني وعمر الشريف كان هيعمل دور يوسف وهبي
حل محمد هنيدي منذ قليل، ضيفًا على برنامج بيت السعد، والذي يقدمه كلا من عمرو سعد وأحمد سعد، المُذاع على MBC 1.
وتحدث هنيدي عن ترشيحه لتقديم جزء ثاني من فيلم إشاعة الحب مع عمر الشريف، وقال : بعد فيلم رمضان مبروك أبو العلمين حمودة، عماد أديب قالي هنعمل إشاعة حب الجزء التاني، وأنا كنت هعمل دور عمر الشريف، وعمر الشريف كان هيعمل دور يوسف بك وهبي.
وأضاف: وفي التحضيرات قعدت مع عمر الشريف، قالي أنت عارف يا محمد الدور ده كان عايز ممثل كوميدي مش عمر الشريف خالص، والفيلم أصلا كان معمول لإسماعيل ياسين.
أما عن اختفاء الكوميديا في السينما والدراما، قال هنيدي: مستحيل الكوميديا تختفي لو اختفت يبقى الأكسجين اتسحب، لكن بتمر فترات بتتغير وتتلون بس الورق هو أهم حاجة وبعده المخرج، والمخرج الكوميدي يعتبر كنز.
وتابع: واللي بيستمر في الكوميديا هو اللي مش بيستسهل الموضوع وفيه مخرجين كبار خايفين يعملوا كوميدي، لأن المخرج لازم يكون دمه خفيف وعنده تكنيك الكوميديا بدليل الأفلام اللي عايشة كلها أفلام نجيب الريحاني وإسماعيل ياسين.
واستكمل: الفنان الكوميدي يقدر يعمل تراجيدي ولكن يصعب عليك زي المطرب العاطفي لكن عبدالمنعم مدبولي لما كبر عمل بابا عبده وراح في حتة تانية.
وتابع: لكن الفنان التراجيدي يعمل كوميدي لو معموله اسكريبت مكتوب كوميدي، زي دور شكري سرحان في السفيرة عزيزة كان كوميدي بس نجح علشان مكتوب حلو.
وأضاف: من فترة قولت للمنتج وليد صبري، لو عايز أعيد حاجة ينفع قالي آه، ونفسي أعيد فيلم السفيرة عزيزة.
