إبراهيم عيسى: يوسف شاهين مش أعظم مخرج وعنده أفلام هبلة والمومياء فيلم سخيف

قال الإعلامي إبراهيم عيسى، إن المخرج العالمي يوسف شاهين مش أعظم مخرج في تاريخ السينما المصرية وعنده أفلام هبلة، مشيرا إلى أن فيلم المومياء للمخرج شادي عبد السلام من أسخف الأفلام الذي شاهدها في حياته.

قال إبرهيم عيسى في الحلقة الأولى من بودكاست “لعل وعسى” في إجابته على سؤال من أعظم مخرج فى تاريخ السينما المصرية: “المخرجين العظماء في مصر كتير جدا مفيهومش أعظم، يوسف شاهين ليه أفلام هبلة كتير جدا وليه أفلام عظيمة كتيرة جدا، زي ما سمير سيف عنده أفلام عظيمة ورائعة”، النسبة ليا كمال الشيخ مخرج عظيم ورائع ليه مكتبوش عنه لأنه مكنش يساري كان يميني، ضد ثورة يوليو مكنش حبيب للقلب، وحسن الإمام فضلوا يقولوا أنه مخرج أفلام العوالم وحسن الإمام حاجة كبيرة جدا وواحد من أعظم مخرجي العالم، مثلا بنفضل نتكلم عن فيلم “الأرض” ليوسف شاهين وعظمة مشهد هجوم الهجانة، وحسن الإمام عمل المشهد ده في فيلم “لن أبكي أبدا”.

وأضاف إبراهيم عيسى: “مخرجين زي علي عبد الخالق لا يكتب عنه لأنه مش في كتالوج النقد اليساري، أشرف فهمي لا يكتب عنه لأنه مش في الكتالوج اليساري، السينما المصرية مليانة عظماء ملهومش أعظم، قمة السينما المصرية قمة مسطحة مش مدببة، هما عايزين يقنعونا أن قمة السينما المصرية زي الهرم يقف عليها واحد بس، لأ قمة السينما المصرية قمة مسطحة واقف عليها مخرجين كبار بأعمال عظيمة، مينفعش نقول أن في أعظم مخرج في السينما اللي هو يوسف شاهين لأ هو لا عظيم ولا خارق”.

وقال إبراهيم عيسى خلال بودكاست “لعل وعسى”: “فيلم المومياء من أسخف الأفلام اللي شفتها في حياتي، الفيلم الجبار اللي لف العالم وأخد جوايز الدنيا وبنتكلم أنه أعظم فيلم مصري، ولا فيلم مصري ولا له علاقة بالسينما المصرية، هو فيلم رائع وعظيم لو اعتبرته فيلم بلجيكي أو أعظم فيلم نرويجي في تاريخ السينما النرويجية”،”إيه المصري اللي فيه والعظمة اللي فيه؟ يعني فيلم بتدور أحداثه سنة 1881 في الصعيد الممثلين بيتكلموا باللغة العربية الفصحى ليه؟ وبيتكلموا كده ليه” الممثل بيقول “أهذه هي عيشتنا” هل دا أداء المواطن الصعيدي؟ دا موطن صعيدي مدبلج”.