محمود كهربا: الخطيب أبويا الروحي.. مدحت شلبي زودها شوية وشديت مع مهيب بسبب رامز

عبر لاعب النادي الأهلي محمود كهربا عن حبه للكابتن محمود الخطيب، قائلًا: “كابتن محمود الخطيب هو الأب الروحي، ودايما بتعلم منه وهو اكتر حد ساندني بخبرته وغير من شخصية كهربا، وقالي لازم تبقى اهدى من كده وبيقعد معايا ويعلمني بخبرته، مبغلطش عشان اي حاجة بعملها باذن الخطيب، ومكلمنيش على حلقة رامز، وميعرفش مشكلتي مع مدحت شلبي، وبيقولى عايزك تساعد الفرقة والفرقة تساعدك مش تلبس تيشرت الاهلي وخلاص”.

وقال محمود كهربا، خلال استضافته ببرنامج “أسرار” مع الإعلامية أميرة بدر المذاع على قناة النهار: “أجلت فرح اختى 4 شهور، لأني كان نفسي اكون معاها وحددت اليوم من غير ما اعرف اننا مسافرين، و استأذنت من المدير الفني، ومفيش مشاكل بيني بين حد في الجهاز الفني، وعندنا اللاعيب لو بيلعب البدلاء بتوعه هما أكبر داعم له، وفرح اختي معملش شرخ بيني وبين كولر”.

وعلق لاعب النادي الأهلي محمود كهربا على أزمته مع الاعلاميين الرياضيين قائلًا: “الإعلام بيبنوا برامجهم باسمي و بيجيبوا ناس مالهاش لازمه عشان يبقوا تريند، وانا مزاجنجي ومدحت شلبي لو حصل ايه عمري ما اطلع معاه، وبيجيب سيرتي بأي حاجة وحشة عشان رفضت اروحله برنامج من 3 سنين”.

وقال محمود كهربا،: “اي حد بيجيب سيرتي بحاجة وحشة بيبقى فيه موقف بيني وبينه قبلها، لكن مدحت شلبي متربص ليا لحد دلوقتي، وعندي طبع ان مهما حد بيقول حاجة ف ضهري كأنه مش موجود ومبشوفش الناس دي، ومبحبش الكلام احب الأفعال بس”.

علق لاعب النادي الأهلي محمود كهربا على غضبه من رامز جلال قائلًا: “شديت انا ومهيب عبد الهادي عشان حوار رامز، وكان الموضوع تقيل عليا وانا معرفش ان فيه مقلب، وكنت رايح البرنامج انه عادي وانا منبه، واتخبط في أيدي، فالاول كنت متضايق وبعدين قلت الحلقة مش عجباني أنه يحصل فيها كده”.

وقال محمود كهربا: “مفيش حد يعرف يهيني، ورامز اخويا وحبيبي، ورفضت اقفل الحلقة عشان مكنتش شايف قدامي، وانا ساعتها مكنتش حاسس لاني بخاف من الكلاب جدًا، بسبب انهم ممكن بيطلوني لعب كورة، ولو رامز كان نزلي كنت هاخد حقي منه، واتكلمنا بعدها وصالحني، وكل مرة ببقى رايح مببقاش عارف انه فيه مقلب، رايح على اساس انه برنامج له علاقة بالكورة، وأنا غضبان بيبقى لساني أعمى وايديا كمان”.

برنامج “أسرار” تقدمه الإعلامية أميرة بدر على شاشة النهار يومياً خلال شهر رمضان، في تمام الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.