حمو بيكا للمتنمرين: بلاش تبقى عامل باقة بـ50 جنيه وتقعد تتنمر على الناس
رد مؤدي المهرجانات حمو بيكا على المعترضين على نجاحه من العدم، والمتنمرين عليه وعلى أعماله قبل شهرته.
قال حمو بيكا: “فترة عملي قبل الشهرة كانت جميلة، كنت أنام مرتاح البال وأعرف أمشي وأخرج، لكن الآن متحجم، وكل حاجة بتعملها بحدود، الأول كنت حر، مافيش إضاءة عليك، دلوقتي بحساب”، حسب تصريحاته لبرنامج Rap Up عبر قناة “المشهد”.
وأضاف حمو بيكا: إيه المشكلة إني جاي من عالم من تحت الصفر، مش نجحت؟ وتعبت ووصلت للي أنا فيه؟ أقول لهم اتعبوا واشقوا وماتبصوش للناس، ما طول ما انت قاعد وشاغل بالك بي هتفضل قاعد مكانك، قوم اشتغل واتحرك وشوف أنت حلمك ايه وأوصل له، لكن طول ما كل واحد قاعد بيتنمر على التاني دا غلط، ما تشقى يا عم، هل أنا لما كنت شقيان عمري في حياتي بصيت للغير؟ عمري في حياتي، بس كان عندي طموح إني هوصل وإني أعمل حاجة.
وتابع: وكنت قاعد مع والدتي قبل ما أغني وقولت لها بكرة هتتباهي بي، قبل ما اغني أو أفكر في الغناء، اجري وراء حلمك، بلاش تبقى عامل باقة انترنت بـ50 60 جنيه وتتنمر على الناس، مصاريف عليك، اشتغل بقى، انت قاعد بقى ماسك لي الفيسبوك وبتشحن بـ40 جنيه عشان تتابعني، الأولى بقى شوف الحياة وبلاش تتنمر على الناس.
