أكمل: عمرو دياب وشيرين خدوا ألحاني.. وصوت الدلتا باعوني عشان حماقي
تحدث المطرب أكمل رسلان عن أغنيته الشهيرة أنت الحب، بجانب الكشف عن عدد من الفنانين الذي استخدموا ألحان أغاينه في أغانيهم.
وقال أكمل، في لقائه مع الإعلامية إنجي هشام، في برنامج “المنسي” المذاع عبر شاشة قناة “هي”: أغنية أنت الحب الناس بتسمعها لغاية دلوقتي، وعصام صاصا عملها بنفس الكلمات مهرجان ونجحت وعاملة 65 مليون مشاهدة، والأغنية دي قعدت سنتين أحمد علي موسى يجبهالي أقوله الله وبعدين يقولي خلاص هشام عباس عايزها وياخدها، وبعدين يرجع يديهاني ووقتها هو كان عايز ينزل مع نجم، وعملتها ونجحت، وبفضل الله عمري ما عملت أغنية ومنجحتش.
وتابع: بتضايق جدًا لما ياخد حد ياخد الأغنية بتاعتي ويعملها مهرجان أو يغير اللحن، وعندي مشاكل حتى مع نجوم كبار اللي هو أنت مسمعتش وروحت خدت لحن شبه لحن أغنية بتاعتي؟، واللي بيضايقني أكتر أن تبقى الأغنية لحني واللي شبها تنجح أكتر.
وأضاف: في نجوم كتير خدوا ألحاني والأغاني بتاعتهم نجحت، زي شيرين عبد الوهاب، ومحمد حماقي، ورامي صبري، وأحمد سعد، والهضبة عمرو دياب، أنا بكتفي بالعتاب لأن أنا مش صاحب الحقوق، شركة صوت الدلتا هي صاحبة الحقوق دكتور نصيف راجل مالوش في المشاكل، لكن لو محسن جابر مبيسبش مزورة.
وأوضح: أنا بتضايق أن أنا اللي اجتهدت وتعبت وشقيت ولحنت وجبت الكلمة، وأنا بعرف من الناس من الناس أن لحني أتاخد، وبعدين هدخل في مشاكل علشان إيه؟ أخد فلوس؟ لا مش فارق معايا.
تحدث المطرب أكمل، عن سبب تركه شركة صوت الدلتا، موضحًا أن المنتج نصيف قوزمان أبلغه أن الشركة فضلت العمل مع الفنان محمد حماقي، بدًلا منه.
وقال أكمل، في لقائه مع الإعلامية إنجي هشام، في برنامج “المنسي” المذاع عبر شاشة قناة “هي”: الشركة فجأة قررت مش هتكمل لأسباب مفهمتهاش، وقالولي خد العقد أنت كده كده عملت كل حاجة إحنا جينا في الآخر قفلنا كام أغنية، وأنا مكنتش فاهم لأني كنت صغير وناجح نجاح رهيب مكنش في أغنية بتنزل في الستنين مبتنجحش، ولو عامل ألبوم 11 أغنية الـ 11 أغنية بينجحوا.
وتابع: الشركة قالتلي أن العقد بتاع محمد حماقي معانا، بينص على أنه يكون المغني الوحيد في الشركة، إحنا مش هنعرف نكمل معاك إنتاج، يا نضحي بـ حماقي يا نضحي بيك، وطبعًا حماقي كان نجم أكبر مني وأنا خدت عقدي ومشيت.
وأضاف: أنا مش فاهم أنا جاي ناجح بالفعل وكنت فاكر أنهم هيمضوني عقد جديد لأن عقدي كان لسة فيه سنتين أو تلاتة، وده كان بداية المشاكل في حياتي، وبدء يجيلي عروض ومش عارف أوافق على مين، واضطريت أخد أحسن عرض مش أحسن شركة ودي كانت غلطتي.
واستكمل: أنا مبعتبرش حماقي السبب ولا الشركة، وكنت صغير ومسألتش حماقي ولا أي حاجة، والله أعلم إيه الكواليس اللي بينهم ومش عارف هو سبب ولا مش سبب.
وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.
