إياد نصار عن أزمة “أصحاب ولا أعز”: اتهزيت ومنى زكي عضمها أنشف مني
تحدث الفنان إياد نصار عن أزمة فيلم “أصحاب ولا أعز” وتعرضه لهجوم كبير بسبب مشاركته فيه.
وقال إياد نصار في لقائه ببرنامج “ضيفي مع معتز الدمرداش”: “كان أول مرة اتعرض لحاجة زي كده ممكن اسمع كلام مش عاجبني حد محبنيش في عمل، مفيش إجماع على ممثل، لكن هجوم كان أول مرة اتعرض له واتهزيت ومكنتش عارف اتعامل مع الموضوع والجهة المنتجة طلبوا مننا محدش يتكلم وأنا كنت عايز أتكلم، ودا كان فخ بصراحة مكنش صح كان لازم نطلع نتلكم”.
وتابع إياد نصار: “معرفتش اتعامل مع الموضوع ده وبعدين طلعت قلت مش عارف، أنا عضمي مكنش ناشف، كنت فاكر إن عضمي ناشف لكن لأ، منى زكي كان عضمها ناشف أكتر مني واتعرضت لده قبل كده في احكي يا شهرزاد هي عارفة تتعامل في المواقف اللي زي دي لكن أنا اتهزيت”.
وأكمل إياد نصار: “أنا عملت الفيلم مقتنع إني عامل حاجة كويسة هتبسط الناس وهيحبوها فجأة لقيت نفسي أنا الشرير اللي بدمر المجتمع وبخدش حياء المجتمع، وأنا من المجتمع وعندي ولاد ومش هقبل على ولاد الناس اللي مش هقبله على ولادي”.
يذكر أن فيلم “أصحاب ولا أعز” تعرض لموجة واسعة من الهجوم بسبب جرأة بعض المشاهد والألفاظ، ونالت الفنانة منى زكي نصيب الأسد من الهجوم بسبب مشهد اعتبره الكثيرون جريئا.
