عصام شكري: محبط من المسرح وضد تمثيل البلوجرز لو مش موهوب

كشف الفنان عصام شكري، عن رأيه في ظاهرة دخول البلوجرز مجال التمثيل، بجانب الحديث عن دور نقابة المهن التمثيلية في إيجاد عملًا للفنانين.

وقال عصام شكري، في لقائه مع الإعلامية إنجي هشام، في برنامج “المنسي“، المذاع عبر شاشة قناة “هي”: أنا مؤمن أن النقابة مش شغلتها تجيب شغل للفنانين، هي معمولة للحفاظ على حقوق الفنانين، بجانب حاجات كتير بيعملها الدكتور أشرف زكي زي العلاج ودار المسنين، وهو حد مجتهد جدًا في الموضوع ده، وكان عامل اجتماع مع أصحاب مكاتب الكاستينج وكان مستاء أنهم بيجيبوا ناس من خريجي معهد السينما أو طلاب، وقال الناس دي لازم تشتغل حتى قانونًا.

وتابع في ناس شالت الموضوع على كتافها علشان هما كويسين والنقاد أشادوا بيهم، أنا كنت من أكثر الناس حظًا أني اشتغلت مع فنانين كبار في الزمن ده، وكانوا بيعلمونا بشكل غير مباشر، واللي موجود دلوقتي لازم يحصل هذا الدمج لأني مش هعمل طول عمري الولد الصغير الرومانسي والشقي، أنا بكبر في السن وهيجيلي أدوار تانية تتناسب مع شكلي وسني.

وعن علاقته بزملائه في الوسط الفني: علاقاتي بالناس كويسة جدًا، وإحنا ممكن نقعد 10 سنين منشوفش بعض، ويكفيني لما نتقابل نتقابل بشكل طيب، لأن المهن متعبة ومرهقة جدًا، وأنا مبحبش تبقى العلاقات شغل وبس، العلاقات الإنسانية عندي في الدرجة الأولى، وأنا على تواصل بفنانيين كتير دلوقتي.

أما عن رأيه في دخول البلوجرز مجال التمثيل، فقال عصام شكري: أنا مش ضد الموهبة، لو موهوب أهلًا وسهلًا بيه، لو مش موهوب مش هينفع، والناس بقى عندها وعي مين اللي بتشوفه وهل موهوب ولا لأ، واللي بيضاقني أن المخرجين بيستعينوا بالبلوجر وهو مش موهوب ويفرضه علينا ويصدق نفسه أنه محصلش، وإحنا في عرض أي حد موهوب.

وأضاف: العناصر اللي مش موهوبة بتعمل إزعاج ولغط على الممثلين اللي موجودين، وأنت كده أذيت ناس تانية، خلي الصورة تبقى واضحة وأنا بشوف شباب على التيك توك موهوبين وبقولهم ده، وأنا مش متعصب أوي ومش لازم اللي يشتغل يبقى خريج معهد السينما.

وأكد الفنان عصام شكري، أنه كان مصاب بالإحباط في بداية مشواره الفني بسبب عدم عمله في المسرح، بجانب الكشف عن حذفه لعدد من مشاهده في الأعمال الفنية بناء على طلبه، وعن الأدوار التي يتمنى تقديمها، قائلا: “جالي إحباط في البداية أن ماحدش بيعرض عليا مسرح خالص وأنا خريج فنون مسرحية، وقابلت أحد المخرجين المسرحيين وقالي أنت مش عايز تشتغل مسرح؟ قولتله أنا هموت واشتغل مسرح، قالي أنا بخاف من ممثلين التليفزيون مبيبقوش فاضين، وبدأت أشتغل مسرح، والكام سنة اللي فاتوا عملت حوالي 5 عروض مسرحية، والمسرح هو الجيم بتاع الفنان، والفنان لو قعد في البيت هيصدي”.

وتابع: أنا كنت بشيل مشاهد لنفسي، لأن كنت بلاقي المؤلف عامل مشاهد وأنا فيها وأنا كنت ببقى قايل المعنى ده في مشهد قبل كده وكنت بشيل المشاهد والمخرجين كانوا بيستغربوا مني.

وأضاف: كنت هشتغل في حديث الصباح والمساء ومضيت عقده، وحصل تغيرات والدور بتاعي اتشال كله، وكان في أدوار كتير كان نفسي أعملها، وفي أدوار خلاص المرحلة العمرية بتاعتها عدت، وأنا كان طول والوقت بيشغلني فكرة إدمان المخدرات كنت عايز اشتغل عليها كتير.

وعن الأدوار التي يتمنى تقديمها، فقال عصام شكري: أنا نفسي أعمل دور متوحد، والضرير، وحاجات شبه الأدوار دي اللي هي معقدة، لأنها بتبقى عايزة مجهود كبير من الممثل.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.